فنجال التناسي

يانوم ليه إن مرّلك طيف هجّيت

وإن مِدّ فنجال التناسي كسرته

ما طاب لك همّي وكثر التشاتيت

أشقيتني في طيف منهو خسرته

عزّاه يا وقت السعد وين قفّيت

ليتك لقلب المهتوي ما فطرته

مرّت شهور وْ كلّ ما أنساه سجّيت

ما قد سرحت بْزاوية وْ ما ذكرته

لا زلت أحنّه وأذكره ما تناسيت

أخر لقى وسط المدامع حضرته

طلب لقاي العام والعام لبّيت

ياليتي لْهاك الوعد.. أعتذرته

جاني يوادع وآنا لمقابله جيت

قلت الوصل قالت عيونه هجرته

يا قوّ قلبه كيف يقوى التناهيت

تخيّر الفرقى عبث ما جبرته

ياليتني أبكم وللكف قصّيت

ما كان صافحته وداع و شكرته