غزل · منشورة على الديوان
ماكان عادي
مَ بين الحبّ.. وسلوم العرب.. والياس والتدليل
توادعنا وانا مدري من المظلوم والبادي ؟
عقب فرقاه.. ما حيّ استهاض الدمع كثر الليل
عسى ليله على خْلافي يمرّه ساكن و هادي
احبه يالله ان تمنع دموعه والحزن والويل
وجنّب كل ما يثقل خُطاه.. لصدري الفادي
اشوفه في وجيه الناس وابهار القمر وسهيل
اشوفه بأجمل آيات الله.. وْ صحواي ورقادي
فقدته حيل.. ياظلم الوداع اللي.. يهد الحيل
وابد ماكان عادي لجل اقول بغيبته عادي